[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
చాక్లెట్
~
నీ అమ్మమ్మ సమాధి
పర్వతపు ఒత్తైన జుట్టును గూడు చేసుకుని
అందులో ఒదిగి ఉంది
నీ అమ్మమ్మలాగా కనిపించే ప్రతి చెట్టుకు
ఒక పేరు పెట్టాలని ప్రయత్నిస్తావు నువ్వు
నీ మామయ్య కారు నడిపే పద్ధతి
నీ సీటు కింద దాగివున్న తుఫాను
అతడు ఓపిక వేగాన్ని మించిపోతూ
కాలాన్ని చంపాలని చూస్తాడు
వెనుకసీటులో నీ తల్లి
నిన్ను గట్టిగా అదిమిపట్టుకుని
నువ్వు కిటికీలోంచి ఎగిరిపోకుండా ఆపుతుంది,
‘ఇంత త్వరగా ఇలా నీ అమ్మమ్మను
చేరుకోబోతున్నాం’ అంటుంది
వేసవి తన తలను
నీ భుజం మీద ఆనిస్తుంది,
నీ యౌవన స్వేదం కోసం దప్పిక గొంటుంది
పడుచుదనం నిండిన వలపు ఒకటి
చెట్ల రెమ్మల మీద విస్ఫోటిస్తుంది
మీ ఆకుపచ్చని బీటిల్ కారు
కొండ అడుగున పడివుంటుంది
అది వేసవి కనుక ప్రతిదీ కరిగిపోతుంది
నీకోసం చాక్లెట్ కొంటానని నీ అమ్మ
బూటకపు వాగ్దానం చేసింది కానీ కొనలేదు
అది నీ సీటుమీద ఏర్పరచిన
చిక్కని ద్రవాన్ని నాకకు
ఆంగ్లమూలం: జిన్ హావో జి.
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.