[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
రాజా చక్రబర్తి కవితలు మూడు
~
(1) చిలుము
నీ సంకెళ్ల మీద
చిలుము చేరనీయకు
లోపలి సంగీతం మరణిస్తుంది
చీమలు మృతకళేబరాన్ని తిన్నట్టుంటుంది,
చిలుము పట్టిన ఇనుము
శాశ్వతంగా ఉండిపోతుంది నీతో
(2) నష్టం
నేనొక సముద్రాన్ని పోగొట్టుకున్నాను
దాని తీరం మిగిలే వుంది కానీ
కెరటాలు లేవు
నేనొక సముద్రతటం మీద నిలబడి వున్నాను
పెద్ద శూన్యమొకటి వీక్షిస్తోంది నన్ను
నా ఈ కళ్లలోకి
నీళ్లు ప్రవహిస్తాయా మళ్లీ?
(3) అంగీకృతి
ఔన్నిజమే
నేన్నిన్ను ప్రేమిస్తున్నాను
కానీ నాకంటె ఎక్కువగా కాదు
ఎందుకంటే అట్లా చేస్తే
నేను నేను కాకుండా ఉండిపోతాను
ఆంగ్లమూలం: రాజా చక్రబర్తి
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.