[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
క్షమాగుణం
~
పరిచితమైన పాట చరణం
గాఢ నిశ్శబ్దంలో గానమై నినదించినట్టు
ఊపిరాడనీయని చీకటిలో
నా మదిలోకి వస్తావు నువ్వు
పచ్చదనం నిండిన కొత్త మైదానంలోకి
పరుగెత్తాలనే నిర్ణయం నీదే
విధి వెలార్చిన ఉన్మాదపు ఊహలో
అందంగా చెక్కబడిన నీ జీవితం
ఒక గాయానికి లేపనం రాస్తూ
రాజీ కోసం ప్రాధేయపడింది
మసకచీకటి గొడుగు కాగా,
దానికింద సప్తవర్ణాలను మెరిపిస్తూ
కలబోశాను విస్మృత గాథల్ని.
“సమయం అయిపోయింది” అని
ఒక మంద్రస్వరం నాలో గుసగుసగా అంటుంది
బాలుణ్ని ఆశ్చర్యంలో ముంచెత్తే
నక్షత్ర భరిత ఆకాశం వైపు చూస్తాను
కరుణ శిలువ వేయబడి,
పాలలాటి చీకటిలోంచి కారుతుంది ధారగా.
నేను సులభంగా క్షమిస్తాను
ఆంగ్లమూలం: అమితా రాయ్
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.