[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
నేను నివసించే నగరం
~
నేను నివసించే నగరంలో
వర్షం కురిసినా కురవకపోయినా
ప్రతి మనిషి రెయిన్ కోటు తొడుక్కుంటాడు
సూర్యుడస్తమించాక కూడా
ప్రతివాడు నల్లని కళ్లద్దాలను ధరిస్తాడు
నేను నివసించే నగరంలో
ఆకాశం గులాబి రంగులో
నక్షత్రాలు లేకుండా దర్శనమిస్తుంది
అందరూ గాలి వీచే దిశలోనే నడుస్తారు
నేను నివసించే నగరంలోని
నీరు సైతం నికృష్టమైనది
దగ్గర్లో సముద్రమేదీ లేకున్నా
ఇక్కడి నీళ్లు మాత్రం ఉప్పగా ఉంటై
సూర్యుని తొలి కిరణాలు
పొరుగింటి బాల్కనీలో పడుతై
ఒక్కొక్కడిది ఒక్కో భాష
ప్రతివాడూ ఇతరుల మాతృభాషను
మాట్లాడుతుంటాడు
బతికేందుకు ఇంతకంటె మంచినగరం లేదా
అని ఆలోచిస్తుంటాను అప్పుడప్పుడు
కానీ,
నేను నివసించే నగరంలో చేయిని చాస్తే
కనీసం ఒకడొచ్చి పట్టుకుంటాడు దాన్ని
బెంగాలీ మూలం: ప్రబల్ కుమార్ బసు
ఆంగ్లానువాదం: ఔష్ణిక్ ఘోష్
తెలుగు అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.