[కేంద్ర సాహిత్య అకాడమీ అనువాద పురస్కార గ్రహీత శ్రీ ఎలనాగ సంచిక పాఠకుల కోసం ప్రత్యేకంగా జాతీయ, అంతర్జాతీయ కవితలని అనువదించి ‘అనువాద మధు బిందువులు’ పేరిట అందిస్తున్నారు.]
ఒక నాస్తికుని మనస్తాపం
~
దేవుణ్ని లక్ష్యపెట్టకపోవటం
అనే యిది సౌకర్యంగా లేదు
భావప్రాప్తి విషయమూ అంతే
మనిషి సవ్యంగా సజావుగా ఉంటాడు నిజమే కానీ
పారవశ్యం కోసం దేవుడు కావాలి
పుస్తకాలు లేని, విశ్వాసం లేని, దేవుడు నిండిన
నా బీరువా అరలో ఆడవాళ్లకొక
ప్రత్యేకమైన స్థలం ఉంది – అది నిజమే
వాల్‌పేపర్‌తో తెల్లగా మెరిసే గోడ మీద నా దేవుళ్లు
దండలతోనో దండలు లేకుండానో వేలాడటం నాకు ఇష్టమే
నాస్తికుని జీవితంలో ముళ్లలా గుచ్చుకునే సమయాలుంటాయి
తప్పు తీర్పులు దుష్టులు
ఉన్నందుకు ఎవర్ని నిందించాలి?
నెమ్మదీ విసుగూ నిండిన రచయిత బతుకుతో ఏం చేయాలి?
నాకు దిగువన ఉన్న మనిషిని చూస్తున్న నన్ను పైనుండి
దేవుడు చూడ్డం లేదు
ఆంగ్లమూలం: శ్రీవిద్యా శివకుమార్
అనువాదం: ఎలనాగ
వృత్తిరీత్యా వైద్యులైన శ్రీ ఎలనాగ (డాక్టర్ నాగరాజు సురేంద్ర) ప్రవృత్తి రీత్యా సాహితీవేత్త. కవిగా, భాషావేత్తగా, విమర్శకుడిగా, అనువాదకుడిగా సుప్రసిద్ధులు.
కేంద్ర సాహిత్య అకాడమీ అనువాద పురస్కార గ్రహీత. తెలుగులోనూ, ఆంగ్లంలోనూ రచనలు చేసే ఎలనాగ గారు సుమారు 40 గ్రంథాలు వెలువరించారు.
‘ఫేడెడ్ లీవ్స్ అండ్ ఫ్లైస్’, ‘ఇంప్రెషన్-ఇమేజెస్’, ‘మెమొరబుల్ మెలోడీ మేకర్స్ అండ్ అదర్ పోయెమ్స్ ఆన్ మ్యూజిక్’ మొదలైనవి ఆయన తెలుగు నుండి ఆంగ్లంలోకి తెచ్చిన కవితా సంపుటాలు.
వట్టికోట ఆళ్వార్ స్వామి, దాశరథి కృష్ణమాచార్య, కాళోజీ నారాయణరావు వంటి సుప్రసిద్ధ తెలుగు రచయితల కథలను, నవలలను ఆయన ఆంగ్లంలోకి తీసుకువచ్చారు. వివిధ దేశాల సాహిత్యాన్ని కూడా ఆయన తెలుగు పాఠకులకు అందించారు. వాటిలో ఉత్తమ లాటిన్ అమెరికన్ కథలు, ఉత్తమ ఆఫ్రికన్ కథలు, సోమర్సెట్ మామ్ కథలు ఉన్నాయి.
వివిధ దేశాల కథల అనువాద గ్రంథం ‘కథాతోరణం’ వెలువరించారు. పవన్ కె. వర్మ రాసిన ‘గాలిబ్: దమ్యాన్, ద టైమ్స్’ గ్రంథాన్ని ‘గాలిబ్ నాటి కాలం’ అనే పేరుతో తెలుగులోకి తెచ్చారు.