సినిమా, సంగీతం, కళలు, క్రీడలు – ఇలా ఏ రంగమైనా, అందులో విశేష ప్రతిభ కనబరిచిన అలనాటి కొందరు వ్యక్తుల గురించి, వారి జీవితంలోని కొన్ని విశిష్ట ఘటనల గురించి, ఉదాత్త ఆశయాలతో జరిగిన కొన్ని కార్యక్రమాల గురించి అరుదైన విషయాలను అపురూపమైన చిత్రాలతో ‘అలనాటి అపురూపాలు’ పేరిట సంచిక పాఠకులకు అందిస్తున్నారు లక్ష్మీ ప్రియ పాకనాటి.
~
మీనా కుమారి మృతికి నర్గీస్ నివాళి:
1972లో 38 సంవత్సరాల వయసులో దీర్ఘకాలిక మద్యపానం వల్ల లివర్ సిర్రోసిస్‌తో మీనా కుమారి అకాల మరణం చెందడంతో చిత్ర పరిశ్రమ శోకసముద్రంలో మునిగిపోయింది. ఆమె సన్నిహితురాలు, సహనటి నర్గీస్ అత్యంత హృద్యమైన నివాళులర్పించారు.
ఒక ఉర్దూ పత్రికలో ప్రచురితమైన హృద్యమైన బహిరంగ లేఖలో, నర్గీస్ తన బాధను వ్యక్తపరిచారు, ఒక దిగ్గజ నటిని మాత్రమే కాకుండా, ప్రియమైన నేస్తాన్ని కోల్పోయిన బాధతో హృదయాన్ని తాకేలా వీడ్కోలు పలికారు.
“మౌత్ ముబారక్ హో మీనా.. మీనా, ఈ రోజు నీ అక్క నీ మరణానికి అభినందనలు తెలియజేస్తూ, మళ్ళీ ఈ ప్రపంచంలోకి అడుగు పెట్టవద్దని కోరుతోంది. ఈ స్థలం నీలాంటి వారి కోసం కాదు.”
ఆ లేఖను తరువాత యాసిర్ అబ్బాసి ‘యే ఉన్ దినోం కీ బాత్ హై: ఉర్దూ మెమోయిర్స్ ఆఫ్ సినిమా లెజెండ్స్‌’లో అనువదించి, ప్రచురించారు. ది ఇండియన్ ఎక్స్‌ప్రెస్ ఆ ఉత్తరాన్ని సంగ్రహంగా ప్రచురించింది, ఇది మీనా కుమారి జీవితంలోని అత్యంత హృద్యమైన అధ్యాయాన్ని – ధర్మేంద్ర పట్ల ఆమెకున్న లోతైన మరియు శాశ్వతమైన ప్రేమను కూడా ఆవిష్కరించింది.
“మీనా ఎవరినైనా గాఢంగా ప్రేమించి ఉంటే, ఆ వ్యక్తి ధర్మేంద్ర. మీనా ఎప్పుడైనా ఎవరితోనైనా ప్రేమలో పిచ్చిగా మారితే, అది ధర్మేంద్ర.” అని నర్గీస్ రాశారు.
అసమానమైన కీర్తి ఉన్నప్పటికీ, మీనా కుమారి మద్యపానంతో పోరాడి ఓడిపోయినప్పుడు ఆమె జీవితం విషాదకరమైన మలుపు తిరిగింది, అది నెమ్మదిగా ప్రాణాలు తీసే వ్యాధి, చివరికి ఆమెను బలిగొంది.
ఒకప్పుడు రెండు బలమైన సృజనాత్మక మనస్సుల కలయికగా భావించబడిన మీనా కుమారి, నిర్మాత కమల్ అమ్రోహిల వివాహ బంధం చివరికి చెదిరిపోయింది. కమల్ ఆమెను చెంపదెబ్బ కొట్టినట్లు ఆరోపణలు వచ్చిన తరువాత, మీనా ఆ ఇంటిని విడిచిపెట్టి, విడిగా జీవించడం ప్రారంభించారు, అది వారి సంబంధాన్ని మరింత దిగజార్చింది. విచారకరంగా, ఆమె మరణించే సమయంలో మీనా కుటుంబం ఆర్థికంగా తీవ్ర ఇబ్బందుల్లో ఉంది, వారు ఆసుపత్రి బిల్లు – చిన్న మొత్తం – 3,500 రూపాయలు కూడా చెల్లించలేకపోయారు. ఆమెకు చికిత్స చేసిన వైద్యుడు దయతో ఆ ఖర్చులు భరించడానికి ముందుకు రావడంతో ఆమె బంధువులు ఆమె మృతదేహాన్ని ఇంటికి తీసుకెళ్లగలిగారు.
మీనా కుమారి ప్రయాణం కేవలం ఒక ఉత్కంఠభరితమైన కీర్తి, ఎదుగుదల కంటే ఎక్కువ – ఇది వ్యక్తిగత వేదన, ఒంటరితనం, ఇంకా నిశ్శబ్దమైన బాధలతో కూడిన లోతైన భావోద్వేగపు కథ. ప్రశంసలు, చప్పట్ల వెనుక ఒక మహిళ అంతర్గత గాయాలు ఎప్పటికీ మానిపోవు. తన వారసత్వంగా, దుఃఖంతో కప్పబడిన అసాధారణ ప్రతిభని; వెంటాడే ఓ శక్తివంతమైన కథని మిగిల్చి వెళ్ళిపోయిన, ఒక ప్రకాశవంతమైన నక్షత్రం చాలా త్వరగా మసకబారింది.
పాకనాటి లక్ష్మీ ప్రియ, బాల్యం నుండే పాత సినిమాలు, సంగీతం పట్ల అభిరుచి కలిగి ఉన్నారు. చలన చిత్రాల విషయ సేకరణకర్త అయిన తన తండ్రిగారి నుండి ఎన్నో సంగతులు తెలుసుకున్నారు, నేర్చుకున్నారు. ఈ సంప్రదాయాన్ని ఆమె సోదరుడు కొనసాగిస్తున్నారు, వారి ఇల్లు సేకరణల నిధి. పుస్తక పఠనం పట్ల ఆసక్తిగల లక్ష్మీ ప్రియ నిత్య విద్యార్థిగా ఉండడానికి ఇష్టపడతారు. ఉస్మానియా విశ్వవిద్యాలయం నుండి ఎం.ఎస్.సి జువాలజీలో బంగారు పతకం సాధించారు. అదే విశ్వవిద్యాలయం నుండి ఎంబిఎ చేశారు. ఒక బిజినెస్ స్కూల్‌లో మార్కెటింగ్ బోధించారు. సున్నితమైన ఆరోగ్యం కారణంగా ఉద్యోగాన్ని విడిచిపెట్టారు. ప్రస్తుతం – పాతకాలపు అభిమానుల ఆనందం కోసం, వారు పాత చిత్రాలు, పాటలు మరియు సమాచార పోస్ట్‌లను ఆస్వాదించేందుకు ఫేస్‌బుక్‌లో మ్యూజిక్ గ్రూప్స్ నిర్వహిస్తున్నారు.