అలనాటి అపురూపాలు – 272

సినిమా, సంగీతం, కళలు, క్రీడలు – ఇలా ఏ రంగమైనా, అందులో విశేష ప్రతిభ కనబరిచిన అలనాటి కొందరు వ్యక్తుల గురించి, వారి జీవితంలోని కొన్ని విశిష్ట ఘటనల గురించి, ఉదాత్త ఆశయాలతో జరిగిన కొన్ని కార్యక్రమాల గురించి అరుదైన విషయాలను అపురూపమైన చిత్రాలతో ‘అలనాటి అపురూపాలు’ పేరిట సంచిక పాఠకులకు అందిస్తున్నారు లక్ష్మీ ప్రియ పాకనాటి.

~

నటుడు ఆఘా:

నటుడు ఆఘా అసలు పేరు అఘాజన్ బేగ్. భారతీయ సినిమాల్లో అత్యంత ప్రసిద్ధులైన క్యారెక్టర్ యాక్టర్‍లలో ఆయన ఒకరు. ముఖ్యంగా బాలీవుడ్‍లో స్వర్ణయుగం అనబడే కాలంలో హాస్య నటుడిగా పలు సినిమాల్లో నటించారు.

భారతదేశంలోని పూణేలో మార్చి 21, 1914న జన్మించిన ఆఘా, ఇరాన్‌కు చెందిన కుటుంబం నుండి వచ్చారు. నాలుగు దశాబ్దాలకు పైగా సాగిన కెరీర్‌లో ఆయన 300లకు పైగా సినిమాలలో నటించారు. హాస్యానికి, సమయస్ఫూర్తికి ప్రసిద్ధి చెందిన ఆయన, బాబ్ హోప్ నటనా శైలి నుంచి ప్రేరణ పొందారు.

ఆఘా తాను కేవలం మూడు రోజులు మాత్రమే బడికి వెళ్లానని, అది తనకు సరిపోలేదని ఒప్పుకున్నారు ఆఘా. గుర్రాల పట్ల ఆకర్షితుడై, జాకీ అవ్వాలనే ఆశతో పూనా రేస్ కోర్స్ చుట్టూ తిరుగుతూ రోజులు గడిపారు. బొంబాయికి వెళ్లిన తర్వాత, అక్కడ స్థానిక నాటక బృందంలో చేరారు, అది చివరికి ఆయనను చిత్ర పరిశ్రమకు చేర్చింది. 1933లో, నటన పట్ల తనకున్న మక్కువతో, కన్వాల్ మూవీటోన్‌లో ప్రొడక్షన్ మేనేజర్‌గా తన సినీ ప్రస్థానాన్ని ప్రారంభించారు.

ఆఘా నటనా ప్రస్థానం 1935లో మెహతాబ్, నజీర్ నటించిన కన్వల్ మూవీటోన్ వారి ‘స్త్రీ ధర్మ’ సినిమాతో ప్రారంభమైంది, ఆ తర్వాత ‘దౌలత్’ (1937), ‘రంగీలా మజ్దూర్’ (1938), ‘కహాఁ హై మంజిల్ తేరీ’ (1937), ‘అనురాధ’, ‘కెప్టెన్ కిషోరి’ (రెండూ 1940) వంటి సినిమాలు కమెడియన్‍గా ఆయనను స్థిరపరిచాయి.

‘సర్కస్ కీ సుందరి’ (1941) సినిమాలో ఆయన పాత్ర ప్రజాదరణ పొందింది. దాంతో, ‘నయీ రోష్ని’, ‘సఫేద్ సావర్’, ‘రోటీ’ (1941), ‘ముకాబలా’ (1942), ‘అమానత్’ (1943), ‘మొహబ్బత్ కి జీత్’ (1943), ‘జ్వార్‍భాటా’ (1944), ‘కెమెరామెన్’ (1944), ‘టాక్సీ డ్రైవర్’ (1944) వంటి చిత్రాలలో ప్రధాన పాత్రలు లభించాయి.

1953లో, ఆఘా – దేవ్ ఆనంద్, ఉషా కిరణ్‌లతో కలిసి ‘పతిత’ చిత్రంలో నటించారు. ఈ సినిమాలో ఆఘా ‘మస్త్రామ్’ అనే ముఖ్యమైన పాత్రని పోషించారు; తలత్ మెహమూద్ ఆలపించి, తర్వాతి కాలంలో క్లాసిక్ సాంగ్‍గా పేరుపొందిన ‘అంధే జహాన్ కే, అంధే రాస్తే, జయే టు జాయెన్ కహాఁ’ పాట ఆఘాపై చిత్రీకరించబడింది. దిలీప్ కుమార్ నటించిన ‘ఇన్సానియత్’ (1955) లో కూడా ఆఘా ఒక ముఖ్యమైన పాత్ర పోషించారు.

జ్వార్ భటా (1944), ఎలాన్ (1947), జుగ్ను (1947), షికాయత్ (1948), బాలమ్ (1949), నజరే (1949), మంగళ (1950), సంసార్ (1951), బాదల్ (1951), దో రాహ్ (1952), అంబర్ (1952), షహెన్ షా (1952), పహ్లీ తారిఖ్ (1954), దేవత (1956), కాలా పానీ (1958), రాజ్‌తిలక్ (1958), నవరంగ్ (1959) వంటివి ఆయన నటించిన మరికొన్ని చెప్పుకోదగ్గ చిత్రాలు.

‘కాలీ టోపి లాల్ రుమాల్’ (1959) మరొక గొప్ప చిత్రం, ఇందులో ‘యారోం కా ప్యార్ లియే నఖరే హజార్ లియే’ పాట ఆఘాపై చిత్రీకరించబడింది.

తరువాతి కాలంలో, ఊమర్ ఖైద్ (1961), అధీ రాత్ కే బాద్ (1965), పడోసన్ (1968), బాంబే టు గోవా (1972), తేరే మేరే సప్నే (1971), పియా కా ఘర్ (1972), రోటీ కపడా ఔర్ మకాన్ (1974), హమ్ కిసీసే కమ్ నహీఁ (1977) వంటి హిట్ సినిమాల్లో నటించారు. 1960లో వచ్చిన ‘ఘూంఘట్’ చిత్రానికి గాను ఆయన ఫిలింఫేర్ ఉత్తమ సహాయ నటుడి అవార్డుకు ఎంపికయ్యారు.

ఆఘా – మాసూమ్ ఆఘా జాన్ అనే మహిళను వివాహం చేసుకున్నారు; ఈ దంపతులకు జలాల్ అఘా అనే కుమారుడు; షహనాజ్, షాహూర్, షాహి అనే ముగ్గురు కుమార్తెలు ఉన్నారు. షహనాజ్ టినూ ఆనంద్‍ను విహాహం చేసుకున్నారు. మృగతృష్ణ (1975) సినిమాలో నటించిన షాహి ఆఘా, నటుడు మెహమూద్ సోదరుడు షౌకత్ అలీని వివాహం చేసుకున్నారు. జలాల్ అఘా కూడా పలు సినిమాల్లో నటించారు. ముఖ్యంగా షోలే (1975) లోని ప్రసిద్ధ పాట ‘మెహబూబా మెహబూబా’లోని సన్నివేశంలో జలాల్ ఆఘా ప్రధానంగా కనబడతారు.

ఆఘా 1992 ఏప్రిల్ 30న పూణేలో గుండెపోటుతో 78 సంవత్సరాల వయసులో తుది శ్వాస విడిచారు.

పతిత (1953) సినిమాలోని ‘అంధే జహాన్ కే, అంధే రాస్తే, జయే టు జాయెన్ కహాఁ’ పాటని యూట్యూబ్ లో చూడవచ్చు:

https://www.youtube.com/watch?v=T_QKUWk6anI