[డా.టి.రాధాకృష్ణమాచార్యులు రచించిన ‘అద్దం ఆవల’ అనే కవితని పాఠకులకు అందిస్తున్నాము.]
నవ్వు నాదే నాతోనే కదా ఉండాలి
కాంతి పరావర్తనం
ముందు నిలిచిన అందాలనన్నీ
అద్దంలో చిత్రించే
నేనూ
ఒక చెట్టులా అక్కడ
ఊగే ఊయల గాలిలో
ఆ వెలుగు నవ్వు వెన్నెల కల
దాటి వెళ్ళింది అటుగా
శూన్యం బింబప్రతిబింబం లేదు
నేను కూడా మరి
అద్దం ఆవల
అంతా పొరలుపొరలుగా విచ్చిన
చీకటి నా మనసులోనే కాదు
ఈ ప్రపంచమంతా పరుచుకుంది
ఇంతలో
బాబూ అనే అమ్మ పిలుపుతీపి
వేయి గెలాక్సీలు కాంతి
నా రెటినాపై
క్విక్ మోషన్ డీప్ ఎమోషన్ ముద్ర
అమ్మంటే తెలిసింది
చీకటికీ బాధకూ విరుగుడని
సుఖసంతోషాల పొత్తిళ్ళ అమ్మే నా బతుకు ప్రొటోప్లాజమని
డా.టి.రాధాకృష్ణమాచార్యులు సీనియర్ వైద్యులు, ప్రముఖ కవి,రచయిత, అనువాదకులు, సమీక్షకులు.
5 సంకలనాలు తెలుగు కవిత్వంలో 1999 నుండి కరీంనగర్ నుండి పబ్లిష్ చేశారు. నలిమెల భాస్కర్ ‘సాహితీ సుమాలు’ వివిధ భారతీయ భాషల్లోని సాహితీవేత్తల పరిచయ సంకలనాన్ని “The Speaking Roots” Title తో ఆంగ్లంలోకి అనువాదం చేసినారు.