ఆడుకొంటున్నాడు ఓ అయిదేళ్ళ పిల్లాడు
అటుగా వచ్చిందో కుక్క, పట్టుకొంది పిక్క
ఊడొచ్చెలా, ప్రాణం పోయేలా
ముందుగా చూసింది నేనే
చురుకుగా కదిలాను… నా ఆయుధంతో
క్లిక్… క్లిక్… క్లిక్.
***
కోపంగా వెళ్ళిపోతోందామె… కొరకొరగా చూస్తూ
వెంటబడుతున్నాడతను… వెర్రిమొర్రిగా
బెట్టు చేస్తోందో… బెడిసికొట్టిందో
ఇంతలో కెవ్వుమందామె
తెల్లని మెడ చుట్టూ ఎర్రని రత్నాల హారం
అతనే చేస్తున్నాడు… కసితో కత్తితో
చురుకుగా కదిలాను… నా ఆయుధంతో
క్లిక్… క్లిక్… క్లిక్.
***
వరదలు… ఒక్క ఉదుటున, వడివడిగా
చిక్కుకుపోయారు వాళ్ళు, బెక్కుమంటూ
నీటి మట్టం పెరుగుతోంది…
చురుకుగా కదిలాను… నా ఆయుధంతో
క్లిక్… క్లిక్… క్లిక్.
***
‘రెడ్ సిగ్నల్’ అందరూ ఆగారు,
వాళ్ళు ఆగకుండా అతడిని కొడుతున్నారు
సిగ్నల్ దగ్గరే…
గ్రీన్ సిగ్నల్… అందరూ కదిలారు
వాళ్ళూ కదిలేరు, వాడి పని పూర్తి చేసి
చురుకుగా కదిలాను… నా ఆయుధంతో
క్లిక్… క్లిక్… క్లిక్.
***
‘డౌన్ డౌన్’ ఊపుమీదుంది ఉద్యమం
‘ధన్ ధనా ధన్’ ఊగిపోతోంది ఉద్యోగం
ఆ రెంటికి చెందని
ఆ చెప్పులు కుట్టుకొనేవాడు
కొట్టుకుంటున్నాడు బుల్లెట్ దిగబడి
చురుకుగా కదిలాను… నా ఆయుధంతో
క్లిక్… క్లిక్… క్లిక్.
***
మా ఛానెల్లో ఇటువంటి ‘ఎక్స్‌క్లూజివ్స్’ ఎన్నో
టి.ఆర్.పి. రేటింగ్స్ పెరిగాయి నా వలనే
అందరూ మెచ్చుకొంటారు నన్ను
విధి నిర్వహణలో చురుకుగా కదులుతానట
మెచ్చుకోనిది పనికిమాలిన అంతరాత్మ ఒక్కటే
వృత్తిధర్మంతో కాకుండా
మానవ ధర్మంతో చురుకుగా కదిలుంటే
కొంతమందైనా బ్రతికేవాళ్ళుగా అంటుంది…
కానీ
కాపాడబోయి నేనే కష్టాల్లో పడితే
నన్ను కాపాడేదెవరు?
‘తనకుమాలిన ధర్మం’ అంటారుగా
కనీసం నా క్లిక్‌లు
కేసులలో క్లూస్ ఇవ్వగలవు
అదో ‘తృప్తి’
‘తుత్తైనా’ అనుకోండి…
పొన్నాడ సత్య ప్రకాశ రావు కథకులు, కవి. వీరివి ఇప్పటి వరకు 1 నవల, 4 ధారావాహికలు, 78 కథలు, 150 కి పైగా కవితలు, వ్యాసాలు వివిధ పత్రికలలో ప్రచురించబడినవి. వీరి నవల ‘ఊరు పొమ్మటోoది’ 2002 సంవత్సరం స్వాతి మాస పత్రిక అనిల్ అవార్డును,. మరి పది కథలు వివిధ పోటీలలో బహుమతులు ను గెలుచుకొన్నవి. వీరి నవలను సాహితీ ప్రచురణల వారు విజయవాడ, కథల సంపుటాన్ని చినుకు ప్రచురణల వారు విడుదల చేసారు .వీరికి విశ్వదాత కల్చరల్ ఫౌండేషన్, ఎలకుర్రు వారు 2023 సంవత్సరానికి ‘విశ్వదాత’ దేశోద్దారక నాగేశ్వర రావు పురస్కారాన్ని అందచేశారు.
